En llínees xenerales vamos tener altes presiones nel país. Pero, concretamente, al noroeste amenacia la entrada d’umbaes atlántiques que, anque entá-yos costará entrar, vamos tener un fuerte gradiente de presión (nel mapa de superficie visualizamos les isobares bien xuntes) polo qu’esperamos un claru protagonista: el fuerte vientu de suroeste. Poro, el llunes prevense intervalos de nubes altes ensin importancia, quiciabes con daqué más de nubosidá escontra’l cordal y más claros escontra la mariña. La probabilidá de precipitaciones para esta xornada va ser bien baxa o nula. Los vientos, como dicíamos, van soplar de suroeste-sur moderaos con raches localmente fuertes nel occidente y en zones altes del cordal, y van dir a más nel tramu final del día. Les temperatures apenes van esperimentar cambeos. Sía que non , nun se refuga un descensu llixeru de les máximes en zones del interior oriental y ascensos locales de les mínimes en puntos costeros.
Depués, el martes va ser un día bien airosu con raches fuertes que podríen superar los 90 kilómetros per hora nes zones más espuestes d’altu monte y del oeste del Principáu. Gracies a estos vientos vamos siguir con un ambiente térmico bien prestosu. Los cielos espérense con nubes medies y altes, anque podría apaecer más nubosidá pel oeste mientres la tarde con posibilidá de dellos bastios a la fin.
