Esperamos una xornada marcada pelos cielos nublos o bien nublos en tol Principáu d’Asturies. En tou momentu, prevese abondosa nubosidá que va dexar precipitaciones xeneralizaes de calter débil anque, por momentos, nun se refuga que puedan ser moderaes. Estes precipitaciones van ser en forma de nieve a partir de los 1600 metros d’altor. Los vientos van ser fluexos polo xeneral. Les temperatures máximes van baxar hasta 5 o 6 ºC respectu al xueves nel occidente, y hasta 4 ºC menos nel oriente. Nel cordal va ser onde’l descensu va ser muncho más llixeru. Les mínimes, sicasí, van esperimentar un ascensu d’hasta 5 ºC nel interior central, y hasta 3 o 4 ºC nel restu. Amás, a partir de les 15:00 hores l’Axencia Estatal de Meteoroloxía va activar l’avisu mariellu na mar por foles d’hasta 4 o 5 metros d’altor.
Esti avisu va enllargase hasta les 16:00 hores del sábadu. En cuanto al tiempu para’l sábadu, entá se preve cierta nubosidá pela mañana na metá norte y cielos más soleyeros na metá sur. Pela tarde van abrise grandes claros polo xeneral polo que s’espera una tarde soleyera. El domingu tamién vamos esfrutar de bon tiempu na nuesa rexón.
