Vamos amanecer con nubes na mariña y cielos más estenos nel restu. Asina tou, vamos reparar como a lo llargo del día esta nubosidad dirá estendiéndose por tola rexón. Les precipitaciones van ser pocu probables pero nun se refuguen, sía que non, orbayos na mariña y, de forma más esvalixada, n’otros puntos de la metá norte asturiana. Los vientos van ser fluexos y variables, pudiendo predominar de nordés na mariña con dalguna qu’otra racha moderada. Les temperatures máximes van baxar ente 1 y 2 ºC respectu al llunes en tol Principáu salvu nel terciu sur onde se van caltener ensin cambeos. Les mínimes apenes van variar con, a lo sumo, dellos ascensos bien llixeros y locales.
El miércoles, día de Nuechevieya, esperamos xuna xornada muncho más sele que la sufierta en Nuechebona. Vamos amanecer con cierta nubosidad que, conforme trescurran les hores, va dir sumiendo pa dexar una recta final del día prácticamente estena. Los vientos van siguir siendo fluexos con posibilidá de delles raches daqué más significatives na mariña. Les temperatures máximes van baxar de forma xeneralizada.
Bon tiempu tamién p’Añu Nuevu. A más llargu plazu, los modelos meteorolóxicos empiecen a agorar la posibilidá d’una entrada d’aire bien frío a partir del 4 o 5 de xineru.
