- Alborecemos col cielu nuboso y nevando feblemente pela cordelera, sobre too na fastera surocidental, anque la nevada ye xeneralizada y amás en cotes baxes como per exemplu en Rusecu nel Alto Nalón que malpenes llega a 400m d’altor. La nevada nun ye mui abondosa pero si complica les carreteres, prauticamente tolos puertos del surocidente tan con cadenes o neumáticos d’iviernu, tando peslláu’l Connio. Les temperatures tan alrodiu de los 4ºC y nel puirtu Payares rexistren -2,8ºC.
- Güei vamos tener intervalos nubosos entemecios ente dellos claros o abancios con nubosdiá de retención na cordelera y fastera ocidental onde tendrán precipitaciones febles y de nieve perriba de los 600m. Al atapecer una nueva llinea d’inestabilidá va dexanos precipitaciones xeneralizaes que sedrán de nieve de nuevu perriba de los 600m. con unes temperatures en bultable descensu. L’aire sedrá gallegu con raches moderaes en zones altes ya en puntos del llitoral.
- Mañana llunes entovía se sabe cuanto van a profundizase ya peronde van tirar les baxes secundaries que van formase nel Cantábricu por mor del aire fríu n’altor que tenemos, polo que’l pronósticu ye mui complicáu de facer. Lo más probable ye que tengamos intervalos nubosos cola posibilidá de dalgún xarabatu pela mañana, sobre too na fastera ocidental ,onde volverá a nevar perriba de los 800m. Yá de tarde abriránse dellos claros y abacios y l’ambiente sedrá más seliquino, con unes temperatures qu’ascenderán llixeramente.
- El martes en principiu nun s’esperen precipitaciones y templará dalgo l’ambiente.
- El miércoles día de nueche bona entamará a soplar el vientu nordés ya dirá baxando les temperatures, sobre too pela tarde, amás tendremos precipitaciones febles que sedrán de nieve anicialmente perriba de los 1400m pa dir baxando hasta los 1000m al finar el día.
- El xueves día del Nadal tendremos un día mui ivernal con descensu bultable de les temperatures, precipitaciones febles en xeneral y nieve a tan solo 300m.
- Los siguientes díes paez qu’escamplará dalgo y les xelaes sedrán les protagonistes.
