- Alborecemos col cielu nuboso, tando la nubosidá más abondosa na fastera más surocidental , onde nieva perriba de los 500m. Tamién tan entrando bastantes nubes pel llitoral central onde llueva dalgo con unes temperatures que tan alrodiu de los 6ºC, rexistrándose nel puirtu Payares -3,9ºC. Reseñar tamién que la llinea d’inestabilidá que mos afeuto ayeri de nueche, dexó nieve mui abaxu nel ocidente asturianu como perexemplu en Bual y en tola comarca de os Ozcos perriba tan solo de los 300-400m.
- Güei vamos tener el cielu nuboso pero sin malpenes precipitaciones, sicasí nestes primeres hores pue haber dellos xarabatos nel llitoral y fastera más surocidental onde la nieve dirá subiendo de cota hasta situase perriba de los 1000m. Les temperatures subirán llixeramente y l’aire gallegu va soplar molestu na costa y zones altes.
- Mañana martes malpenes vamos tener precipitaciones, de dase sedrá dalguna gotera o xarabatín feble ya dispersu con unes temperatures que subirán un poco anque malpenes lo vamos a notar, l’ambiente seguirá siendo ivernal. L’aire sedrá sele ya variable.
- El miércoles entamará a soplar vientu nordés que pali que pali mos dirá echando una masa fría continental que nun mos apurrirá munches precipitaciones pero si fríu. Esti día dirán surdiendo, por retención, precipitaciones febles, sobre too nel llitoral con nieve al finar el día perriba de los 800m.
- El día del nadal sedrá’l más fríu de la selmana, amás vendrá acompangáu de precipitaciones febles, sobre too nos cordales del prellitoral onde nevará perriba de los 300m, L’aire sedrá de componente norte floxu y les temperatures descenderán bultablemente con másimes que malpenes algamarán los 5-6ºC.
