- Alborecemos con nubosidá baxa que mos dexa dalgo d’orpín na meta norte d’Asturies, tando más escampláu hacia l’ocidente con unes temperatures que tan alrodiu de los 8ºC, rexistrándose nel puirtu Payares -0,5ºC.
- Güei pali que pali dirán dixebrándose les nubes baxes pa dexanos el cielu con nubes ya claros o abancios con unes temperatures másimes en descensu ya coles mínimes que van dase col camudu l’añu. L’aire sedrá del nordés con dalguna racha moderada nel llitoral.
- Mañana xueves alboreceremos con xelaes en munches zones d’Asturies y col cielu poco nuboso en xeneral anque durante la mañana dirá aumentando la nubosidá pa dexanos la tardiquina nuble. L’aire sedrá sele ya variable en xeneral y les temperatures másimes subirán llixeramente o camudarán poco.
- El viernes vamos tener el cielu cubierto con precipitaciones pela tarde que sedrán febles en xeneral con unes temperatures mínimes en bultable ascensu, mentantu que les másimes camudarán poco o descenderán llixeramente, onde si va notase l’ascensu va ser nes zones de montaña onde la nieve solo aparecerá nes cumes más altes.
- El sábadu s’anicia un descensu de les temperatures y seguiremos con precipitaciones que fadrá que surda la nieve perriba de los 1500m a primeres hores, pa dir baxando hasta los 700-800m pela tarde-nueche.
- A partir del domingu y con muncha cautela, vamos dir viendo como evoluciona la previsión de los modelos meteorolóxicos, según salen esta mañana , el domingu podriemos tener un descensu bultable de les temperatures con sensaciones térmiques mui baxes por mor del vientu nordés que va soplar cafiante, sobre too nel llitoral, nel cielu tendremos nubosidá estratificada pero sin malpenes riesgo de precipitaciones. En principiu sedrá un fríu seco.
- La cosa se complica de cara al llunes, mos entra dalgo de fríu n’altor y amás los vientos tienden a picar más de componente norte polo que podríemos tener xarabatos intermitentes durante tol día y nevar tan solo perriba de los 200-300m, pero esto yá lu diremos viendo.
Hai muncha incertidumbre de lo que pueda pasar finalmente’l llunes, de fechu l’AEMET nun ta actualizando pronósticos pa esi día porque la nevada pue ser xeneralizada en casi toa España pero como ta too coyido con pinces y ye un día especial paezme que nun se quieren moyar.
