El fuerte retayu de la cuota de la xarda
va suponer un golpe fuerte pa les rules asturianes
La facturación va cayer en, polo menos, 4 millones y mediu. Ye la cuarta especie qu’apurre más dineru.
El pasáu añu supunxo cuasi 5 millones y mediu. La tisoriada impuesta dende Bruxeles anguaño va retayar en polo menos 4 millones y mediu estos ingresos. Paez difícil qu’otres especies de gran valir llogren suplir esti retayu al caltenese la so cuota.
La merluza y el bonitu representen cuasi la metá de los ingresos. La merluza supón más de 17 millones y el bonitu 13 millones d’euros. La tercer especie más relevante económicamente ye’l bocarte al raspiar los 10 millones d’ingresos.
La xarda supón más del 8% de los 67 millones y mediu d’euros qu’ingresaron les rules en 2024, una cifra bien asemeyada a la de 2023, añu nel que superó los 5,7 millones d’euros.
El director xeneral de Pesca yá avanzó que tanto la propuesta de retayu del 90%, como la provisional del 70% de la xarda pa 2026, diba tener un fuerte impactu económicu nes rules.
