Cerráu’l puertu del Conio y cadenes n’otros siete altos de monte. Empieza l’iviernu y la nieve ye la protagonista güei en munchos puntos d’Asturies. Valgrande-Payares esibe imaxe dafechu navidiega, con xuegos na nieve, anque nun se columbren esquiadores. La previsión ye que siga nevando y qu’haya más frio. Enagora, güei tampoco falta’l sol, para completar esta postal. Ye la estampa perfecta para dar la bienvenida a la nueva estación.
Cai tamién la primer nevada del iviernu na contorna de los Picos d’Europa. Ellí hai les primeres acumuladures de nieve a partir de los 685 metros.
Cerráu’l puertu del Conio y cadenes n’otros siete altos de monte
La nieve cayida nes últimes hores caltien esti domingu zarráu al tráficu’l puertu del Conio y obliga al usu de cadenes n’otros siete altos de monte de la rede secundaria de carreteres del Principáu.
Según informa’l 112 Asturies, precísase l’usu de cadenes nos puertos del Palu, Pozu de les Muyeres Muertes, Alto de Bustantigu, Braña / L.leitariegos, Zarreú, Valdeprado y Alto del Xardón.
Tamién ye obligatoriu l’usu cadenes na carretera AS-264, en Cabrales, y establecióse un corte total na CO-8 (Cuadonga-Los Llagos), en Cangues d’Onís, y na LN-8 (Tuiza-Puertu de la Cubilla), en L.lena.
L’Axencia Estatal de Meteoroloxía (Aemet) preve para esti llunes n’Asturies cielu nublu y probabilidá d’agües y cota de nieve en 700-800 metros, que va xubir a 900-1.000 metros pela tarde.
L’Aemet estableció mañana avisu mariellu en Cordal y Picos d’Europa pola posibilidá de nevaes que podríen algamar groseces de cinco centímetros percima de 900 metros.
