SIN TITULO / Autora JEZABEL RODRÍGUEZ
Testu NATALIA ALONSO
Diz Marta D. Riezu que «los oxetos activen la nuesa conciencia». La escritora va más allá cuando aportuna en que cree que los oxetos «tienen conciencia y tán vivos». Nun son meros instrumentos funcionales, sinón que contribúin a la conformanza del nuesu habitar nel mundu ostentando, inclusive, una trescendencia lárica nel sentíu de deidaes del llar. Son depositarios de significaos, emociones y ciños, alcordances y,inclusive, acciones, ayudando a la acomodación de la nuesa esistencia. Les coses, como les persones, tamién tienen biografía. L’enser ta venceyáu al ser.
Como muertes desaterraes a la lluz, con un aura y una dignidá casi humanes, aquellos oxetos callaos que pasen inalvertíos na rutina del dir y venir de los díes aísllennos del ruiu esterior y, suspendíos n’una especie de murnia mira, conformen paisaxes íntimos del escurrir de la vida cotidiana que nagua por lo absoluto al traviés de lo senciello.
Esti testu de Natalia @natalia_alar describe a la perfección esi silenciu reconfortante que nos tresmiten los oxetos esenciales que nos ufierta Jezabel, l’aparente cencellez tresmitida al traviés d’infinites xeneraciones . Naide inventó’l vasu como un oxetu únicu, el vasu de vidriu surdió cola civilización minoica y sicasí nada representa meyor la idea de “compartir” , la celebración, qu’un vasu de sidra n’Asturies.
Jezabel Rodríguez @jezabel_rodriguez ye una de les artistes plástiques más relevantes del panorama visual asturianu, la so trayectoria profesional ta poblada de reconocencies, esposiciones individuales y colectives imposibles de numberar nesti pequenu espaciu, el más recién foi’l Premiu Nacional de Pintura de Villaviciosa recibíu’l pasáu xueves.
Natalia Alonso ye una reconocida xestora cultural d’ámbitu nacional especializada n’Arte Contemporaneo. Desenvolvió la so carrera nel ámbitu del comisariáu les galeríes y les feries d’arte. Anguaño ye directora d’Arte Uviéu y directora comercial d’Arte Informáu, ente otres actividaes .
