La Conseyería de Cultura, Política Llingüística y Deporte da un nuevu pasu na so estratexa pa convertir la Estación Ivernal y de Monte de Valgrande-Payares nun motor económicu y turísticu del valle de L.lena mientres tol añu. Actualidá
El Conseyu de Gobiernu autorizó’l gastu pa la Fase II-B del proyectu de desestacionalización y modernización del complexu, con un presupuestu de 992.699,38 euros, financiáu con cargu a los presupuestos del Principáu y susceptible de recibir cofinanciación europea al traviés del Fondu de Transición Xusta.
Esta fase nueva céntrase n’actuaciones que refuercen la ufierta turística y deportiva más allá de la temporada de nieve, con una apuesta pola sostenibilidá y la integración paisaxística. Ente les intervenciones destaca la construcción de dos miradores panorámicos na zona de Cuitunigru, que van ofrecer vistes privilexaes al Parque Natural de Les Ubiñes-La Mesa y al monte de Lleón, asina como la creación de senderos accesibles que van conectar la telecabina con estos puntos estratéxicos.
El proyectu tamién inclúi la finalización del circuitu d’esquí de fondu, adaptando la so execución pa caltener los nicios de la guerra civil atopaos na zona sureste del trazáu. Esta circunstancia obligó a modificar el diseñu inicial y optar por soluciones qu’eviten escavaciones y garanticen la protección del patrimoniu cultural.
Amás, van acometese trabayos de construcción, meyora y caltenimientu de rutes de senderismu, como la que conduz al Parador de Payares, la circular de Monte Valgrande, la ruta a la cascada del Ortigalón y la ruta alta de Payares. A estes actuaciones súmase la creación d’un circuitu de bicicleta de monte o bikepark, que va aprovechar les infraestructures de la telecabina pa ufiertar una esperiencia ciclista única, y la renaturalización del entornu, que va favorecer la integración paisaxística y la recuperación de zones afectaes poles obres d’esti remonte, nel que’l Principáu invirtió alredor de 10 millones.
Estos trabayos van complementase cola tercer subfase del plan pa desestacionalizar y modernizar Valgrande-Payares, que se va desarollar en paralelo cola instalación d’un telesiella de pinza fixa y la illuminación de les pistes. Estes meyores van dexar ampliar horarios, diversificar actividaes y aumentar la capacidá de tresporte na zona alta de la estación, de forma que se consolida l’apuesta pola desestacionalización y l’accesibilidá.
Con estes actuaciones, la Conseyería de Cultura, Política Llingüística y Deporte incrementa’l so compromisu cola modernización del complexu, col impulsu d’un modelu de desarrollu sostenible que combina deporte, naturaleza y turismu, y que refuerza’l papel de la estación como destín singular nel norte peninsular.
