Naide toca a la gaita les temes de Hevia como’l mesmu Hevia. Pero’l xaponés Koji Koji Moheji nun lo fai nada mal. Este ye nome artísticu del gaiteru nipón Kojima Yuki, que nes redes sociales protagoniza vídeos faciendo les sos propies versiones de les composiciones del gaiteru asturianu más internacional. Ye casi un Hevia, pero dende Tokio.
.play the MBS-300 2011/8/6″ frameborder=»0″ allow=»accelerometer; autoplay; clipboard-write; encrypted-media; gyroscope; picture-in-picture; web-share» referrerpolicy=»strict-origin-when-cross-origin» allowfullscreen /iframe]
Asina, puede vése-y interpretando temes tan conocíes como “Busindre Reel” o “Sobrepena”, que formen parte del yá llexendariu trabayu del gaiteru asturianu “Tierra de Naide”, el LP editáu en 1998 y que lo catapultó a los escenarios internacionales. Gracies a esi discu, Hevia llogró’l Multiplantinum Europe Award, que reciben los artistes que consiguen vender un millón de discos.
Koji Koji nun ye Hevia, pero tampoco lu fai mal. Tien una de les gaites electróniques coles que Hevia revolucionó’l mundu de los gaiteros. El mesmu gaiteru maliayés reconoz que’l xaponés “podría tar tranquilamente ente los diez meyores gaiteros d’España”.
La so vinculación cola música folk ye potente, anque s’inclina más escontra Galicia. Ello ye que participó en dellos concursos relevantes na vecina comunidá autónoma, ente ellos el festival d’Ortigueira, y protagonizó actuaciones na televisión autonómica gallega.
En 2007 cumplió unu de los sos suaños, pelegrinar a Santiago, onde se presentó en bicicleta. Al llegar a los pies del Apóstol, tocó la gaita, tal que suañara largamente. Entós, ante los medios, Kojima Yuki presentábase como “gaiteru diabolista”, pos combinaba la música del preséu tradicional con un espectacular manexu del diábolo nes sos actuaciones caleyeres.
Koji Koji Moheji ye un personaxe singular. En realidá’l so preséu principal ye l’órganu de rabil, el popular organillo. Protagoniza distintos eventos “por tou Xapón” y tamién ufierta sesiones didáctiques n’escueles. Toca un órganu de rabil de 27 notes, fabricáu por Odin en Francia, que “destacar por aprovechar al máximu’l soníu nítido que solo un órganu de llaves puede producir”, esplica esti músicu na so páxina web. Y añede: “Al ser un preséu tan raru, los sos conciertos dan gran importancia a la primer impresión, como la que se produz al escuchalo per primer vegada y el primer contactu col preséu”.
En 2021, asumió’l retu d’iguar y crear llibros pal Limonaire 1900, un gran preséu musical automáticu del Salón de los Salones de Kiyosato. Los llibros tán compuestos por fueyes furada que al entrar na máquina activen unes tecles o otres, creando la melodía.
Koji Koji asegura que la so web que “tres una refecha investigación, convirtiose na primer persona en Xapón en crear con ésitu un llibru pa esti preséu”. N’abril de 2022, completó’l so primer órganu manual y empezó a trabayar como organero manual.
