Va ser un día realmente bien fríu en tol Principáu. La masa d’aire frío d’orixe árticu entra de llenu y, amás, cargada de mugor. La mañana va presentase bien estable con cielos inclusive pocu nublos o estenos en gran parte de la rexón. Pasaes les 14:00 hores va entrar nubosidá pol lladral occidental y va dise estendiendo escontra l’oriente y escontra el sur. Estes nubes van dexar precipitaciones que van dir de menos a más y van acabar afectando a tola Comunidá, pero especialmente na mariña y tamién nel sector occidental onde s’esperen les primeres nevaes del día a partir de los 400 metros d’altor. Conforme meyora la tarde les precipitaciones tamién van ganar protagonismu n’otros puntos del Principáu onde van ser en forma de nieve a partir de los 400 metros, pudiendo baxar hasta los 300 metros. Poro, les Cabalgates del oeste asturianu van tar marcaes poles precipitaciones llibrándose de la inestabilidá les del oriente cuidao que van tardar les agües un poco más en llegar. Seya como quier, van ser unes Cabalgates bien fríes con temperatures ente los 4 y los 6 ºC a les 18:00 hores en prácticamente cualquier puntu d’Asturies.
Mientres la próxima madrugada les precipitaciones entá van tar presentes y podríen dexar nieve a partir de los 300 metros. Dependiendo de les condiciones del momentu, nun se refuga que pueda vese dalgún falopu en cotes inferiores pero ensin consistencia. A lo llargo del día de Reyes la inestabilidá va unviar pero, igualmente, va ser un día xelador.
