Esperamos cielos con más nubosidá escontra l’oeste y escontra el cordal. Nestos sectores les nubes van ser de tipu baxu y van poder dexar bastios mientres el día. Nel restu, la nubosidá va ser de tipu altu o mediu a lo sumo con escasa probabilidá de precipitaciones mientres gran parte de la xornada. A la fin de la tarde sí que van aumentar les nubes polo xeneral y van dexar precipitaciones que se van dir moviendo d’occidente a oriente afectando a munchos puntos del Principáu.
Lo más destacao va ser, ensin dala dulda, la intensidá de los vientos. Van Soplar de suroeste con raches moderaes que van dir a más hasta ser localmente fuertes sobremanera nel oeste asturianu, na mariña y zones altes del cordal. A la fin de la tarde los vientos van afitase d’oeste y va ser el momentu nel qu’entren les agües enantes mentaes. Por cuenta de los fuertes vientos, tanto na mariña occidental como nel suroeste l’Axencia Estatal de Meteoroloxía va activar l’avisu mariellu por raches d’hasta 90 km/h a partir de les 9 de la mañana. Mar adientro prevense raches d’hasta 74 km/h (fuerza 8) con foles que van dir aumentando’l so altor a lo llargo de la tarde hasta poder algamar los 5 metros.
