Entá se preven raches localmente fuertes de vientu de componente sur mientres la mañana y, a lo sumo, primeres hores de la tarde. Les zones altes del oeste y el cordal van ser los sectores onde más se vean afectaos por esos vientos. Ello ye que l’Axencia Estatal de Meteoroloxía va tener activáu hasta’l mediudía l’avisu mariellu nel cordal por raches d’hasta 90 km/h. Nel restu de la rexón les raches van ser moderaes a lo sumo. Conforme meyora la tarde vamos reparar como la intensidá va dir a menos hasta acabar siendo fluexos. En cuanto al estáu de los cielos, vamos tener más nubosidá escontra’l cordal y otres zones del terciu sur onde les precipitaciones van ser más probables y frecuentes con nieve a partir de los 1700 o 1800 metros.
Nel restu del interior y especialmente na mariña la inestabilidá va ser bien poco probable y los cielos van tar cubiertos a lo sumo por intervalos de nubes medies y altes insignificantes. Les temperatures máximes van ser idéntiques a les del llunes, ente que les mínimes van baxar moderadamente na metá oeste y de forma llixera na oriental.
El miércoles los vientos van ser fluexos y variables. Les nubes van dir de más a menos polo que se preve que’l sol cobre protagonismu. Y tocantes a les temperatures, van baxar tanto les máximes como les mínimes.
