Esperamos una xornada marcada polos vientos de componente sur. Mientres la mañana y les hores centrales del día preven vientos moderaos con intervalos fuertes o bien fuertes en zones altes del occidente y tamién del cordal. A lo llargo de la tarde, y sobremanera al anochecer, los vientos van dir claramente abocanando. L’Axencia Estatal de Meteoroloxía va tener activáu hasta les 18:00 hores l’avisu nel cordal por raches d’hasta 90 km/h en cotes altes de dichu sector. Igualmente, va destacar el vientu na mar. A partir de les 17:00 hores de la tarde na mariña occidental y a partir de les 18:00 hores na oriental, va activase l’avisu mariellu por fuertes vientos (fuerza 7) y foles que podríen algamar los 5 metros d’altor. Les temperatures máximes van baxar nel oriente hasta 2 o 3 ºC menos que’l miércoles, ente que nel occidente van caltener ensin grandes cambeos. Les mínimes apenes van variar. En cuanto al estáu de los cielos, prevense intervalos de nubes medies y altes pela mañana con enclín a apaecer nubes más baxes mientres la segunda metá del día que van dexar precipitaciones pel oeste que se van dir moviendo escontra l’oriente. La cota de nieve va dir baxando dende los 1800/2000 metros hasta los 1200/1400 metros mientres la tarde.
El vienres preven cielos nublos con posibilidá de precipitaciones que van dexar nieve a partir de los 900 metros. Para la fin de selmana, entá hai cierta incertidume pero tou paez indicar que les condiciones meteorolóxiques van presentase abondo más estables de lo que se prevía nun primer momentu.
