Empezamos la selmana con un llunes nel que vamos amanecer con cielos pocu nublos salvu nel oeste onde se preve mayor nubosidad. Estes nubes van dir moviéndose escontra l’oriente percorriendo tola rexón. Al so pasu, van dexar precipitaciones de calter débil que van poder afectar a cualquier puntu del Principáu. La cota de nieve va rondar ente los 900 y los 1100 metros lo llargo del día. Los vientos van empezar de suroeste a primeres hores pero rápido van afitase d’oeste, momentu nel que la nubosidad va espandir por tola rexón. A la fin del día, los vientos volverán soplar de suroeste y los cielos van llimpiar de nubes polo que la xornada va acabar prácticamente estena. Les temperatures máximes van ser bien similares a les d’esti domingu pero, sicasí, les mínimes van baxar de forma bien significativa nel centru y nel oriente asturianu, ente que nel sector occidental apenes van variar.
El martes va ser un día airosu con raches moderaes de suroeste que podríen aportar a localmente fuertes nel occidente asturianu. La nubosidad va concentrase sobremanera nel oeste y nel cordal, ente que nel restu esperen intervalu de nubes altes ensin importancia. Los vientos de sur van consiguir que les temperatures xuban al respective de güei llunes.
