Esperamos intervalos de nubes medies y altes mientres tol día salvu nel cordal onde la nubosidá va ser más compacta. La probabilidá de precipitaciones va ser bien baxa y, sía que non, podríen escapase delles precipitaciones débiles nel sur del Principáu. Los vientos van soplar de sur-suroeste con raches moderaes nel occidente y en zones altes de monte. Nel restu, van ser fluexos con dalgún qu’otru intervalu moderáu de forma puntual. Les temperatures máximes van xubir en tola franxa costera ente 2 y 3 ºC respectu al llunes. Tamién van xubir na metá occidental, ente que nel restu d’Asturies van caltenese ensin cambeos o van esperimentar un ascensu bien llixeru.
Les mínimes apenes van variar polo que s’esperen unos rexistros bien similares. A partir del mediudía activaráse l’avisu mariellu na mar por posibilidá de foles d’hasta 4 metros d’altor. El miércoles va ser un día airosu con raches de sur-suroeste localmente fuertes nel oeste y nel cordal (hasta 90 km/h) y raches moderaes nel restu. Les temperatures mínimes van xubir notablemente (hasta 8 ºC más) y les máximes van xubir de forma xeneralizada hasta 4 ºC.
Los cielos volverán tar protagonizaos por intervalos de nubes medies y altes, anque nun se refuga mayor nubosidá pela tarde con posibilidá de delles precipitaciones que podríen percorrer la rexón d’occidente a oriente. Vamos siguir con avisu por foles d’hasta 4 o 5 metros d’altor. A más llargu plazu, tou apunta a una fin de selmana iverniza propiu de les feches y que vamos dir detallando a lo llargo de la selmana.
