Esperamos un día marcáu polos fuertes vientos de suroeste. Les raches más altes van rexistrase, amás d’en la mariña, en zones altes del sector oeste y, sobremanera, nel cordal. L’Axencia Estatal de Meteoroloxía va caltener activáu l’avisu mariellu hasta les 18:00 hores nel cordal por fuertes vientos d’hasta 90 km/h. Asina tou, los modelos meteorolóxicos indiquen que podríen llegar a superase los 90 km/h nos cumes más altos.
Tamién destaca la situación marítima. Va tar activáu l’avisu mariellu per parte de l’AEMET hasta les 16:00 hores de la tarde por foles d’hasta 5 metros y, a partir d’esa hora, l’avisu va pasar a nivel naranxa por posibles foles d’hasta 7 metros d’altor. Nun se refuga que na mariña puédanse tamién superar los 90 km/h a lo llargo de la tarde, sobremanera na mariña occidental. Les temperatures, gracies a los fuertes vientos de suroeste, van xubir de forma xeneralizada tanto nel casu de les mínimes como nel de les máximes. Les mínimes van xubir hasta 8 ºC respectu al martes, ente que les máximes van xubir hasta 3 o 4 ºC más. En cuanto al estáu de los cielos, espérase menos nubosidá pela mañana pero, conforme meyora’l día, les nubes van dir a más y van dexar posibles bastios que van percorrer la rexón d’oeste a este.
