Esperamos una mañana estable. Prevense cielos pocu nublos con daqué más de nubosidá escontra l’occidente y escontra el sur. A lo llargo de la tarde, y por cuenta de la presencia de llínees d’inestabilidá, la probabilidá d’agües va dir n’aumentu. Van entrar precipitaciones pol occidente y van dise estendiendo escontra l’oriente col pasu de les hores. La cota de nieve va tar alta pos va rondar los 1700/1800 metros anque, mientres el tramu final del día, va baxar hasta los 1200 o 1300 metros. Tocantes a les temperatures, van xubir de forma xeneralizada tanto les mínimes como les máximes hasta 5 o 6 ºC en dambos casos respecto al miércoles.
Parte de culpa d’esti ascensu tiénenlo los vientos de suroeste que van soplar en tola rexón con intensidá moderada y, por momentos, con intervalos fuertes en zones altes del occidente, cordal y tamién en puntos costeros.
Tocantes a avisos meteorolóxicos, solo va tar activáu l’avisu na mar. Hasta les 21:00 hores va tar activáu l’avisu mariellu por foles d’hasta 5 metros d’altor y, pasaes les 21:00 hores l’avisu va pasar a nivel naranxa por foles d’hasta 7 metros. Esti avisu va enllargse mientres tola xornada del vienres.
Amás, el vienres vamos tener avisos mariellos nel suroccidente, nel cordal y na mariña occidental por raches de vientu que podríen algamar los 90 km/h. Los cielos van tar nublos con precipitaciones más probables mientres la mañana y hores centrales, y les temperatures van baxar.
