- Alborecemos col cielu cubiertu y lloviendo con unes temperatures que tan alrodiu de los 8ºC, rexistrándose nel puirtu Payares 1,2ºC.
- Güei vamos tener el cielu mui nuboso con precipitaciones ente febles ya moderaes que puen ser persistentes con unes temperatures n’ascensu moderáu, sobre too en zones de montaña onde dexará de nevar pa dar pasu a la lluvia. L’aire sedrá ábrigu con dalguna racha moderada en zones altes de montaña.
- Mañana martes lloverá dalgo al alborecer col pasu d’un frente que mos dexará al so pasu un descensu nes temperatures, tornando a nevar nes montañes perriba de los 1200m. Durante’l día remitirán les precipitaciones menos na fastera más surocidental d’Asturies onde seguirá lloviendo, amás seguirán baxando les temperatures asina como la cota de nieve que al finar el día pue situase perriba de los 600m. L’aire gallegu pue soplar con raches fuertes en zones altes ya en puntos del llitoral.
- El miércoles va seguir inestable con precipitaciones na fastera surocidental d’Asturies que podrán estendese al restu d’Asturies pero de manera feble ya dispersa con un ambiente que va seguir siendo fríu con nieve nes montañes.
- Paez que’l xueves torna l’aire ábrigu y con él un nuevu ascensu de les temperatures pero esto yá lu diremos viendo.
Per otru lláu na estratosfera tan dándose camudos favoretibles pa que tengamos un mes de febreru entreteniu con un vórtice polar totalmente dixebráu, desparramáu pol hemisferiu norte que mos dexará una dinámica atmosférica lloca.
