- El Tiempu n’Asturies./ Semeya d’archivu coyida pela rede de Pablo Ruiz Photography
- Alborecemos con nubosidá estratificada ya con unes temperatures que tan alrodiu de los 3ºC, rexistrándose nel puirtu Payares -6,3ºC.
- Güei vamos tener nubosidá estratificada entemecida ente dellos claros o abancios con aumentu de la nubosidá pela tarde que mos dexará precipitaciones moderaes al finar el día con truena y xarazu nel llitoral y nieve perriba de los 300-400m nos valles de la metá sur d’Asturies, tando la cota más alta na fastera central y llitoral d’Asturies. L’aire sedrá del nordés rolando y arreciando a componente norte pela tarde.
- Durante’l prósimu riscar seguiremos con precipitaciones y xarabatos xeneralizaos ya con nieve en zones baxes pero de los valles del interior y ye qu’una pequeña depresión que ta formándose por mor del contautu del fríu n’altor y el mar Cantábricu va apurrinos una ventolera considerable barriendo l’aire fríu en capes medies y baxes y apuriéndonos un par de graos de más na fastera central y llitoral vinientes del mar, situación que nun llega afeutar a los valles del interior al tar más abellugaos de la marina y onde la persistencia de les precipitaciones provocará desplomes de la cota de nieve.
- Al alborecer tenderán a remitir y dirán abriéndose dellos claros o abancios pa dexanos el cielu poco nuboso pela tarde. Les temperatures van camudar poco y l’ambiente sedrá puramente ivernal.
- El miércoles dempués de xelar tola nueche aumentará la nubosidá ya podremos tener dalguna gotera o xarabatín a primeres hores que sedrá de nieve en cotes baxes al principiu, pa subir rápidamente una vegada qu’avance la mañana, templando l’ambiente cola entrada de vientu gallegu. Durante’l día seguirá l’ambiente nuboso pero sin malpenes precipitaciones.
