THE ASTURIANER N 73 / «LOS VIAXEROS» / Autora COVA SANDES
De pequeña, al cruciar la Plaza de Porlier, solía reparar con interés a esi home de bronce. Él yera l’eternu foresteru, el que siempres acababa de llegar cola so gabardina y les sos maletes, conxeláu nun pasu que nunca terminaba. Yo, sicasí, sentía que pertenecía a estes cais, a esti rincón del mundu.
Güei, al volver a casa por estes feches, crucio la plaza abasnando la mio propia maleta.
Los mios fíos señalen la escultura y con interés pregunten quién ye. Y, de sópitu, l’espeyu devuélveme la mirada: agora la que ta de camín soi yo.
La que torna a casa, pero con billete de vuelta.
Llevóme años y miles de kilómetros entender que ‘El Viaxeru’ nun se taba colando. Taba esperándonos. A tolos que crecimos equí ensin saber que vivíamos nel paraísu, y tuvimos que dinos p’aprender a echalo de menos.
Despidimos l’añu rindiendo homenaxe a la icónica escultura El regresu de Williams B. Arrensberg, obra del llangreanu Eduardo Úrculo, asitiada nel corazón d’Uviéu y conocida popularmente como El Viaxeru. Cova añade-y el plural y tresciéndela, convirtiéndola en símbolu del movimientu migratoriu tan amestáu a les xentes d’esta formosa tierra, un fenómenu nel qu’ella mesma s’inclúi, como ecu social d’una problemática que nun camuda col pasu de los años.
Cova Sandes @covasandes ye arquitecta y ilustradora profesional, especializada n’ilustración infantil. Na so obra destaquen animales entrañables y paletes de colores vibrantes que tresporten a los neños a universos máxicos. La so mayor fonte d’inspiración son los sos fíos y el so perru Pipo. La so propuesta artística pon el focu na diversidá y l’inclusión, ufiertando una visión del mundu atentu, interesada y llena d’esperanza.
Anguaño, compaxina’l so trabayu en proyectos editoriales cola vienta de llámines ilustraes. Collaboró con veceros como Google @culturaoviedo y y diverses instituciones académiques internacionales.
