Víctor Raúl Pintáu, Colectivu Antroxu Tradicional d’Avilés : La Vieya ye un símbolu ancestral y nada pudo acabar con ella. Hai referencies a esti personaxe siquier dende principios del sieglu pasáu, pero créese que ye muncho más antigua. El Comercio
Víctor Raúl Pintáu (Avilés, 1973), a quien toos conocen como Vitu, ye unu de los responsables de qu’un personaxe que s’esaniciara del Antroxu avilesín, la Vieya, volviera a estes fiestes, lo mesmo que de qu’eses figures venceyaes al Antroxu tradicional, y ancestral, fuérense faciendo buecu na programación d’estos díes. Puede vése-y sol traxe de la mesma Vieya o afatiáu con un capirote, nel so enfotu por recuperar les costumes d’estes feches. Un Antroxu tradicional qu’esti domingu va vivir el so día grande col Cortexo de Mazcaritos Tradicionales programáu para la una de la tarde.
–¿Y esi gorru?
–Ye como los que vemos nos cuadros d’Evaristo Valle. El caperucho. Esistíen los sabanones, que diben con sábanes o ropa de cama, pero n’Avilés a los que llevaben esti gorru llamábase-yos caperuchos.
–¿D’ónde vien l’enfotu por recuperar l’Antroxu tradicional?
–Ye que soi amigu del etnógrafu Alberto Álvarez Peña, y falando un día con él surdió la idea de dir recuperando eses celebraciones venceyaes al calendariu agrícola, dende Ánimes al Nadal, l’Antroxu, San Xuan…
–¿Costó saber cómo se celebraba esta fecha?
–Atopamos a Paco Sánchez, que foi’l impulsor de la recuperación del Antroxu avilesín nos años 70 y 80. Taba metíu dientro de la Gran Orde del Antroxu. Yera’l lletráu del Conceyu, y bien cultu. Él empezó a falar cola xente más mayor, que recordaba cómo fuera. Consiguióse información sobremanera de Valliniello, onde xuna mazcarada baxaba a la villa d’Avilés nos carros revistíos el llunes de mercáu pidiendo l’aguilandu. Depués, col dineru, montaben una xordia.
–¿Y en la villa que se faía?
–Para sabelo consultamos LA VOZ DE AVILÉS, y empezaron a salir coses, por casu los bailles de la Vieya de principios de sieglu. Yera un baille burgués que se faía’l domingu de piñata.El Miércoles de ceniza yá se faía l’entierru de la sardina. Depués atopamos a Pepe Venancia, que recordaba cómo en Miranda salíen personaxes con ropes vieyes… una mazcarada más rural.
–¿Hai munchos datos?
–Non, pero na VOZse recoyíen xuna serie de bandos municipales nos que s’alvertía la prohibición de que salieren personaxes que, por casu, refundiaren farina o granos de maíz, lo qu’acota eses alcordances de la xente cola que falemos.
–Y, ¿ta costando integralo nel antroxu actual?
–Hai un alderique internu, pero nun podemos tar al marxe del Antroxu modernu, porque si nun vamos siguir viendo la Vieya y los mazcaritos como’l pasáu, y podemos faer una recreación puntual, pero nos verán como unos frikis’. Y cuando faltemos nós va sumir.
–¿Y eso cómo se consigue?
–Pos el domingu vamos faer una mazcarada rigorosa a nivel etnográficu, solo con mazcaritos, pero los demás díes quixímos tar presentes. Y creo que lo tamos consiguiendo. Y a ver si podemos proxectalo hasta’l futuru.
–¿Cuándo surde la Vieya?
–Pos nun lo sabemos. Sabemos qu’a principios del sieglu pasáu taba, pero de xuru vien de muncho más tras. Y queremos que se convierta nun símbolu que representa lo más ancestral. Nin la Guerra Civil nin la mala interpretación que se fixo cuando s’esanició la quema… nada pudo con ella. Ye la esencia del Antroxu tradicional.
–Y amás agora lleva la firma de Favila.
–Sí, ye que con una recreación de trapos vieyos nun llegamos a la xente, asina que-y pidimos un xigante o un cabezudu. Y salió esta recreación de la Vieya, a mediu camín. Y depués fiximos el Cornelu. Y puedo dicir qu’hai un antes y dempués desque Favila y Carmen Peláez fixeron la Vieya, que va viendo yá como un símbolu.
–¿vamos vela baxar el Descensu?
–Buf. Ese sí que sería otru alderique, y gordu. Nunca se sabe. Yá sabemos que-y gusta la folixa
