Miles de Frailecillos tán apaeciendo nes mariñes atlántiques europees. Solo nes sableres asturias nos postreros dias recoyéronse dellos cientos, como exemplu, ayeri, nuna sola sablera de Ouviñana recoyimos 36 cadabres. Y esto ye solo la punta del iceberg, una y bones estes aves que se reproducen nel norte d’Europa pasen l’iviernu más al sur, a munches milles mar adientro, llueñe de la mariña y por eso envalórase que menos del 10% van llegar a la mariña y de esos, una mínima parte van ser reportaos.
Como munchos vais saber a estes altures, miles de frailecillos tán apaeciendo en toles mariñes del Atlánticu, dende Portugal hasta Bretaña. La inmensa mayoría muertos y unos pocos bien debilitaos y por desgracia con bien poques probabilidaes de sobrevivir.
L’encamientu ye la de siempre nestos casos, avisar al 112 y echar voz de la presencia, sobremanera d’aves vives por que la guardería pase a recoyelos.
Una de les coses que se ta notando nesti episodiu de mortalidá tan inusual, debíu al encadenamientu de toles umbaes que sufrimos mientres l’últimu mes, con fuertes marexaes que comprometieron l’alimentación d’estes aves, ye qu’un porcentaxe bien alzáu de los fraicecillos que tán apaeciendo son aves adultes, lo que tien un mayor impactu a nivel poblacional, una y bones la mortalidá xuvenil ye bien alzada en condiciones normales, contrariamente a lo qu’asocede colos adultos reproductores, qu’amás tarden munchos años en maurecer y solo ponen un güevu cada temporada de cría.
Dalgunos pueden llegar a vivir hasta 30 años.
