Infobae
L’osu pardu “renaz” nel norte d’España tres más de 150 años dende la so desapaición: “Reflexa un ecosistema en bon estáu de caltenimientu”. Un estudiu documentó la torna del animal a zones de Llión, Zamora y Ourense.
Casi dos sieglos tres la so desapaición, l’osu pardu consolidó’l so regresu a les sierres del noroeste ibéricu. Asina lo axustó un estudiu, publicáu na revista Quercus y n’Actualidá Xurídica Ambiental, que documentó la torna del animal a zones de La Cabrera (Llión), La Carballeda y Sanabria (Zamora), según árees estremeres d’Ourense, onde nun esistíen rexistros modernos de la especie.
El trabayu, robláu por investigadores recueye 85 cites confirmaes d’osu pardu ente 2012 y 2025 en territorios onde l’animal nun dexara buelga recién. La documentación fai alusión concretamente a datos llograos a partir d’observaciones directes, buelgues verificaes, daños en colmenares, estudios de fototrampeo y testimonios tantu de residentes como d’axentes medioambientales.
Carlos Javier Durá Alemañ, investigador Ramón y Cajal del Conseyu Cimeru d’Investigaciones Científiques (CSIC) y primer autor del estudiu, esplicó pa EFE que la escoyeta d’información empezó en 2013, en detectando la primer cita en Vega del Castillo, en Zamora. De magar, la so torna consolidóse n’enclaves como Valdavido, Truchillas, Encinedo o Saceda -en Llión-, según nos conceyos de La Carballeda y Sanabria (Zamora). La recurrencia de los avistamientos y rastros indica que “la presencia del osu ye yá estable y non puramente esporádica”, según la investigación.
La confirmación de Durá ye especialmente clave, yá que representa un cambéu trascendental pa la biodiversidá local. Enagora, l’osu pardu sigue catalogáu como especie en peligru d’estinción n’España, onde nun se superen los 400 exemplares, asitiaos ente los Pirineos y el cordal Cantábricu.
El fechu de que l’animal “espandise escontra otres zones” ye fundamental, pos eso indicaría que’l país ta cumpliendo “col mandatu de la UE de que la especie tenga un estáu de caltenimientu favorable” pal so desenvolvimientu.
