Asturies batió en 2025 el so récor de turismu rural al rozar los 305.000 visitantes. RTPA
Los agospios estrahoteleros asturianos recibieron l’añu pasáu cuasi 800.000 viaxeros que durmieron 2,7 millones de nueches, según la encuesta asoleyada güei pol INE. D’eses nueches más d’un millón, les más, fueron nos campings.
El turismu rural, foi la segunda opción más escoyida con 921.470 nueches. Na llista siguen los apartamentos turísticos y a la fin los albergues. La cifra de les persones qu’escueyen agospios alternativos a los hoteles sigue medrando.
Asturies batió en 2025 el récor de turismu rural al rozar los 305.000 visitantes, según datos del INE. Ente setiembre y avientu los turistes medraron un 9,5% gracies a los Bonos de Turismu Rural llanzaos pol Principáu. El datu qu’afita cola tónica de los meses previos, onde la mengua de visitantes rurales yera de cuasi’l 3%.
Los hoteles asturianos xubieron los sos precios un 8%, pero los sos ingresos reales medraron entá más, un 10%, gracies a que tamién algamaron enllenar más habitaciones. Asturies foi la comunidá autónoma onde más medraron estos ingresos.
Amás medra la desestacionalización de los visitantes. Los periodos fuera del branu concentraron un 55,5% de turistes, 3 puntos y mediu más qu’en 2024. Sicasí, nos meses de branu, de xunetu a setiembre, concentráronse el 44,5% de turistes, tres décimes menos que’l mesmu trimestre del añu anterior.
