Nel día de la llucha escontra’l cáncer reclámase una atención más integral y humana. Vezos saludables y participar en peñeraos, conseyos de Salú nel Día escontra’l Cáncer. RTPA
La Conseyería de Salú aconseyó a la ciudadanía, por mor del Día Mundial escontra’l Cáncer, caltener vezos de vida saludables y participar nos programes de peñeráu qu’ufierta’l sistema sanitariu públicu como estratexa de prevención frente a esta enfermedá.
Asina, recordó que vezos nocivos como’l tabaquismu, el consumu escesivu d’alcohol o la obesidá, estrechamente rellacionaos con dalgunos de los tumores más frecuentes, caltienen una alta prevalencia ente la población asturiana y que la prevención ye la vía más eficaz y eficiente pa prevenir y controlar esta patoloxía.
Tocantes a los programes, afitó que’l Serviciu de Salú del Principáu (Sespa) ufierta anguaño tres programes de peñeráu pa favorecer el diagnósticu tempranu d’otros tantos tipos de cáncer: colorrectal, de mama y de cérvix y que la detección temprana ye fundamental p’abordar el tratamientu y pa meyorar la supervivencia y la calidá de vida de les persones afectaes.
El Códigu Européu contra’l Cáncer recueye los siguientes encamientos xenerales:
- Nun fume. Nun peracaba nengún tipu de tabacu. Faiga de la so casa un llar ensin fumu. Sofite les polítiques antitabacu nel so llugar de trabayu.
- Caltenga un pesu saludable. Faiga exerciciu a diariu. Llinde’l tiempu que pasa sentáu.
- Coma saludablemente: Peracaba gran cantidá de ceberes integrales, llegumes, frutes y verduras.
- Llinde los alimentos hipercalóricos (ricos n’azucre o grasa) y evite les bébores azucaradas.
- Evite la carne procesada y llinde el consumu de carne colorao y d’alimentos con muncho sal.
- Llinde’l consumu d’alcohol, anque lo meyor para la prevención del cáncer ye evitar les bébores alcohóliques.
- Evite una esposición escesiva al sol, sobremanera en neños. Utilice protección solar. Nun use cabines de rayos UVA.
- Nel trabayu, protéxase de les sustances canceríxenes cumpliendo les instrucciones de la normativa de protección de la salú y seguridá llaboral.
- Asegúrese de que los sos fíos participen en programes de vacunación contra la hepatitis B (naciellos) y el virus del papiloma humanu.
Para les muyeres, recueye los siguientes conseyos:
- La lactancia materna amenorga’l riesgu de cáncer nes madres. Si puede, dea de mamar al so ñácaru.
- La terapia hormonal sustitutiva (THS) aumenta’l riesgu de determinaos tipos de cáncer. Llinde’l tratamientu con THS.
