Nun son lo mesmo, siquier nun lo yeren, l’Antroxu que l’Antroxu, denominación asturiana esta postrera –al pie de otres en función del territoriu como Antrueyu, Antruidu, Antroiru, Entroido…– d’esa fiesta que llama a ponese’l disfraz y el mazcaritu para prestase, baillar, cantar, comer bones viandes y llambiaes ensin llende.
N’orixe’l Antroxu empezó como celebración de la entrada del nuevu añu y la crecedera de los díes tres l’equinocio d’iviernu –d’ende les mazcaraes d’iviernu qu’entá perviven na actualidá– y tornó col pasu de los sieglos –y l’influencia de la relixón– n’una fiesta na qu’echar el restu primero que s’impunxera la rigorosa Cuaresma.
La cuestión ye que los asturianos, bien entrao yá’l sieglu XXI, apúrrense cada vez más al Antroxu ensin pensar enforma nel so orixe o denominación. Llámese como se llame lo cierto ye que les celebraciones nun fallen y el calendariu cada vez s’allargar más. La fiesta nel Principáu sabe a frixuelos o fereioxolos, a casadielles, a chocolate, a goxa enllena de berces, a carne de gocho…
Y celébrase de mil y un maneres, nos que les xornaes gastronómiques, los desfiles con impresionantes xarrés o amarutes (hasta de mascotes), l’entierru de la sardina y la música de charangues son una constante, ensin escaecer otros «inventos» más recién como l’esitosu Descensu de Galiana n’Avilés o l’Entierru del Salmón en Les Arriondes. Anguaño hasta Donald Trump haise infiltráu.
