Siguimos con un panorama meteorolóxicu marcáu pol protagonismu de les socesives umbaes atlántiques. Esti martes n’Asturies prevese mayor nubosidá escontra l’occidente y escontra el cordal. Nestos sectores les precipitaciones van ser más probables y podríen dexar nieve a partir de los 700/800 metros pudiendo xubir hasta los 900 metros a lo llargo del día. Nel restu de la rexón apenes s’espera inestabilidá y nos cielos van predominar los intervalos de nubes medies y altes a lo sumo y, inclusive, va haber momentos nos que se van abrir grandes claros.
Los vientos van soplar de suroeste moderaos con posibles raches localmente fuertes nel cordal pero va ser raru qu’algamen los 70 o 80 km/h nes zones más altes. Les temperatures máximes van baxar llixeramente na metá sur y van caltenese nel restu al respective de ayeri llunes. Les mínimes van baxar na metá oriental y nun van variar na occidental. Mientres la madrugada del miércoles va aumentar la intensidá de los vientos nel sur asturianu con posibilidá d’algamar, ya inclusive superar, los 100 km/h.
El miércoles va ser un día airosu con nubosidá variable y una mayor probabilidá de precipitaciones nuevamente nel oeste y sur del Principáu, ensin refugar que pueda escapase dalgún bastiu nel restu mientres la primer metá del día. La cota de nieve va xubir hasta los 1400 o 1500 metros d’altor. Les temperatures van xubir nel casu de les máximes y van caltenese nel de les mínimes.
