Esperamos una xornada relativamente estable, anque con alerta na mariña. Los cielos van presentase con intervalos nublos en llínees xenerales con más nubosidá escontra l’occidente y escontra el sur onde les precipitaciones van ser daqué más frecuentes. Nel restu la probabilidá d’agües va ser bien baxa anque nun se refuga que pueda escapase dalguna gota puntual.
La cota de nieve va rondar los 900 o 1000 metros aprosimao pela mañana con enclín a baxar hasta los 700 o 800 metros pero la inestabilidá va ser residual. Los vientos van siguir soplando de suroeste con raches moderaes que podríen ser localmente fuertes en zones espuestes del occidente y nel cordal, sobremanera pela mañana. Les temperatures máximes van baxar na metá oriental hasta 2 ºC respectu al xueves, y apenes van variar na metá occidental. Tocantes a les mínimes, van baxar nel oriente y nel cordal y nun van sufrir variaciones nel restu.
Mientres tola xornada va tar la mar baxu avisu mariellu por posibilidá de foles d’hasta 5 metros d’altor. El sábadu esperamos una mañana soleyera en prácticamente tol Principáu con delles nubes, nuevamente, escontra’l sur y escontra el terciu oeste asturianu. A lo llargo de la tarde nun se refuga que la nubosidá vaiga n’aumentu. Los vientos van ser más fluexos pero van siguir predominando de suroeste. Les temperatures van xubir nel occidente y van caltenese ensin cambeos nel restu d’Asturies.
