Esperamos una xornada pa nada iverniza tocantes a les temperatures. Les máximes van xubir en tol Principáu. Na metá occidental van xubir hasta 2 o 3 ºC respectu al llunes y na metá oriental prevese un ascensu d’hasta 5 o 6 ºC. Les mínimes tamién van xubir de forma xeneralizada hasta 5 ºC más. Con éses vamos amanecer con temperatures percima de los 14 o 15 ºC na mayoría de poblaciones asturianes. Estes temperatures van xubir col intre de les hores hasta algamar, ya inclusive poder llegar a superar, los 20 ºC mientres la parte central del martes.
El centru y l’oriente asturianu van ser onde se rexistren les máximes más altes. Los vientos van soplar de suroeste moderaos con posibilidá de raches localmente fuertes en zones elevaes del occidente y tamién nel cordal. En cuanto al estáu de los cielos, prevese nubosidad polo xeneral anque con momentos tamién de delles escamplaes. Les nubes van dexar bastios irregularmente partíos que podríen ser localmente significativos, sobremanera nel suroccidente asturianu. La cota de nieve va tar percima de los 2200 metros d’altor.
El miércoles va ser un día marcáu polos fuertes vientos que van activar los avisos meteorolóxicos na mariña, nel suroccidente y cordal. A más llargu plazu, lo más destacao va ser la posibilidá de ver nieve a partir de los 700 o 800 metros para’l vienres y el sábadu.
