El martes foi un día airosu nel que se superaron los 100 km/h na nuesa rexón. Concretamente llegaremos llegar a anotar los 102 km/h en Vega d’Urriellu (Picos d’Europa), pero tamién destacaron los 99 km/h en Cabu Bustu, los 84 km/h n’Ibias, los 81 en Taramundi, los 80 en Cabo Peñes y, inclusive, los 74 km/h n’Uviéu y los 72 km/h en Xixón.
Pos el miércoles la situación complícase entá más. A partir de les 12:00 hores del mediudía activaráse l’avisu mariellu en tolos sectores del Principáu d’Asturies por raches d’hasta 100 km/h que podríen algamase en cada unu d’ellos. Asina tou, ye importante destacar que dellos modelos meteorolóxicos agoren raches d’hasta 120 km/h en zones elevaes del occidente y tamién nel cordal oriental.
Amás, va tar activáu l’avisu mariellu na mar por foles d’hasta 5 metros d’altor y, a partir de les 18:00 hores, l’avisu va pasar a nivel naranxa por foles d’hasta 6 metros d’altor y fuertes vientos.
Les temperatures máximes volverán ser bien prestoses cuidao que apenes van esperimentar cambeos. Sía que non, podríen baxar llixeramente nel interior oriental. Les mínimes sí van baxar ente 2 y 4 ºC na metá occidental y van caltenese ensin cambeos na oriental. Poro, van volvese a algamar los 20 ºC n’Asturies produciéndose, de nuevu, una clara anomalía térmica positiva pa les feches nes qu’atopamos.
Estos rexistros térmicos van oldear colos que s’esperen pal vienres y el sábadu cuando va nevar a partir de los 700 o 800 metros. A lo último, en cuanto al estáu de los cielos pal miércoles, prevese más nubosidá escontra l’occidente y sur, y más claros escontra l’oriente. Les precipitaciones van ser más frecuentes tamién nel oeste y nel cordal, pero nun se refuga que de forma puntual puedan afectar momentáneamente a otros sectores asturianos.
