Les foles van poder ser d’hasta 7 metros d’altor y pollo va tar activáu l’avisu naranxa na mar. Esti avisu va pasar a mariellu a partir de les 18:00 hores por foles d’hasta 5 metros. En cuanto al estáu de los cielos, prevese más nubosidad escontra’l suroesté onde les precipitaciones van ser más frecuentes. Sicasí, vamos tener más claros conforme avancemos escontra l’oriente y escontra la mariña. Pela tarde les nubes podríen faer más actu de presencia polo xeneral pero, a priori, la inestabilidá va ser bien poco probable salvo nel cordal y suroeste. Les temperatures van baxar hasta 3 o 4 ºC nel casu de les máximes y apenes van esperimentar cambeos les mínimes.
El vienres vamos amanecer con estabilidá pero un frente fríu al mediudía va dexar la entrada d’una masa d’aire frío que va camudar les condiciones meteorolóxiques na nuesa rexón. La cota de nieve va dir baxando progresivamente hasta los 800 o 900 metros. Na madrugada del sábadu va siguir baxando hasta los 600 metros. Les precipitaciones van ser xeneralizaes tanto’l vienres como’l sábadu, anque nel casu del sábadu van tender a unviar a lo llargo de la tarde.
El miércoles algamaronse los 141 km/h en Cabu Bustu siendo unu de los rexistros más altos de toa España. Pero tamién destacaron los 132 y 131 km/h en Cabrales y en Cabu Peñes respectivamente, o los 128 km/h en Picos d’Europa. Toos estos rexistros entraron dientro del top 10 nacional de raches más intenses del día ente les estaciones meteorolóxiques distribuyíes pola Axencia Estatal de Meteoroloxía.
