Encaramos dos xornaes que se van asemeyar más a lo que s’espera esta dómina del añu. Una umbada que se va dir moviendo escontra’l mediterráneu va afectanos de llenu cuidao que va venir cargada d’abondoses precipitaciones y d’una masa d’aire bien frío que va consiguir baxar la cota de nieve de forma bien significativa. Amás, l’aproximamientu pol atlánticu d’un anticiclón va favorecer la entrada, por cuenta de la so situación, d’aire proveniente de llatitúes más altes. Poro, esti vienres vamos amanecer entá con vientos de suroeste pero, xusto antes del mediudía, un frente fríu va camudar el panorama meteorolóxicu por completu.
Los vientos van dir afitándose de noroeste y va ser l’entamu d’esti curtiu pero intensu episodiu ivernizu. La nubosidad va cubrir tola rexón y va dexar precipitaciones xeneralizaes que podríen ser localmente fuertes por momentos y nun se refuga que puedan venir acompañaes de nube na mariña especialmente. La cota de nieve que va empezar sobre los 1300/1400 metros, va asitiase sobre los 1000 metros a mediudía, sobre los 800/900 metros pela tarde y los 600/700 metros na madrugada del sábadu.
Les temperatures van baxar hasta 5 o 6 ºC al respective de les del xueves. Poro, va ser difícil que puedan superase los 12 ºC na mariña y los 9 o 10 ºC nel interior. Na mar va tar activáu l’avisu mariellu hasta les 22:00 hores por foles d’hasta 5 metros y, a partir d’esa hora, va pasar a nivel naranxa por foles d’hasta 6 metros. Amás, por cuenta de les nevaes, va tar activáu l’avisu mariellu a partir del mediudía nel suroccidente y el naranxa nel cordal por espesures d’hasta 10 y 20 centímetros respectivamente a partir de los 1000 metros, a pesar de que se va ver nevar en cotes más baxes.
El sábadu prevese una mañana bien inestable con precipitaciones xeneralizaes que van dexar nieve a partir de los 700/800 metros, pero a lo llargo de la tarde van dir unviando d’occidente a oriente hasta acabar abrir grandes claros a la fin del día.
