Vamos amanecer con cielos bien nublos y precipitaciones que van dexar nevaes a partir de los 600 metros. Hasta les 12 hores del mediudía va tar activáu l’avisu naranxa nel cordal y el mariellu nel suroccidente por nevaes significatives. Mientres la segunda parte del día vamos reparar como les precipitaciones van tender a unviar y la nubosidad va dir siendo cada vez menos compacta. Ello ye que van acabase abriendo grandes claros a la fin de la tarde y primeres hores del anochar. Los vientos van soplar de noroeste moderaos con delles raches daqué más significatives nel cordal. Estos vientos van dir abocanando hasta’l puntu d’acabar siendo fluexos y variables a la fin del día.
Les temperatures máximes van baxar ente 2 y 3 ºC na metá oriental y nel cordal, y de forma muncho más llixera nel occidente. Les mínimes van baxar en mitad sur y van caltenese na metá norte al respective de les anotaes del vienres. Na mar espérase aguaxe y, por ello, va tar activáu l’avisu naranxa nel sector occidental hasta les 12:00 hores y nel sector oriental hasta les 14 hores por foles d’hasta 7 metros. A partir d’eses hores l’avisu va pasar a mariellu hasta les 18 hores por foles d’hasta 5 metros.
Tiempu estable pa mañana domingu acompañáu d’un ascensu térmicu xeneralizáu.
