Vamos encarar una xornada marcada polos fuertes vientos de suroeste-oeste que van dir de menos a más a lo llargo del día. Pela mañana les raches más fuertes van rexistrase nel occidente y nel cordal, pero a partir del mediudía estes fuertes raches tamién van afectar a cualesquier otru puntu de la rexón. A lo llargo de la tarde, por si fora poco, van aumentar la so intensidá, sobremanera na mariña.
L’Axencia Estatal de Meteoroloxía (Aemet) va activar l’avisu mariellu en tol Principáu polos fuertes vientos. De 9:00 a 19:00 hores va tar activáu nel suroccidente, cordal y zona central d’Asturies por raches d’hasta 90 km/h. Dende les 12:00 hores hasta la medianueche va tar activáu na mariña, igualmente, por raches d’hasta 90 km/h. Comoquier, dellos modelos meteorolóxicos agoren la posibilidá de que na mariña puedan rexistrase hasta 120 km/h a partir de la tarde.
En cuanto al estáu de los cielos, prevense escamplaes pela mañana pero aumentu de nubes a partir del mediudía. La probabilidá de bastios va dir n’aumentu col intre de les hores. La cota de nieve va empezar sobre los 1700 o 1800 metros, va baxar hasta los 1300 metros de primeres de la tarde, y va siguir baxando hasta asitiase sobre los 800 metros a la fin del día, pudiendo baxar hasta los 600 metros mientres la madrugada. Les temperatures van baxar de forma xeneralizada.
