Siguimos con tiempu estable n’Asturies. Les altes presiones siguen bloquiando la llegada la entrada d’umbaes polo que vamos siguir ensin precipitaciones na nuesa rexón. Los cielos van tar pocu nublos con, a lo sumo, dellos intervalos de nubes altes ensin importancia mientres la segunda metá del día. Los vientos van ser fluexos y variables anque van acabar predominando de sur a la fin de la xornada y nun se refuguen raches de componente este na mariña pela tarde. Les temperatures máximes van xubir en tol Principáu.
Nel cuadrante noroccidental van xubir hasta 5 ºC, nel oriente van xubir hasta 3 o 4 ºC y na metá sur l’ascensu va ser más llixeru pudiendo ser d’hasta 2 ºC más.
Les temperatures mínimes apenes van esperimentar cambeos. L’anticiclón dirá moviéndose escontra l’interior del continente européu y eso va dexar que se vaya averando una umbada atlántica que, por cuenta de la so posición, va empezar a unviar vientos de sur mientres les últimes hores, pero sobremanera del martes.
Concretamente, el martes va ser un día térmicamente bien prestosu cuidao que volverán xubir les temperatures gracies a unos vientos de sur que van dir aumentando la so intensidá pudiendo ser localmente fuertes en zones altes del cordal.
