Esperamos una xornada estable y térmicamente bien prestosa. Va ser un día primaveral en tol Principáu. Los vientos de componente sur moderaos con dalguna qu’otra racha fuerte nel cordal van ayudar a que les temperatures sían inclusive daqué más altes que les anotaes el llunes. D’esta forma, vamos amanecer yá con unos rexistros térmicos bastante más prestosos cuidao que se preven temperatures percima de los 11 o 12 ºC a les 8 de la mañana na mariña y nel interior central y oriental d’Asturies.
Estes temperatures van dir xubiendo col pasu de les hores hasta llegar a superar los 20 ºC de forma prácticamente xeneralizada en tola rexón. Ye posible que la máxima más alta pueda llegar a rondar los 23 o 24 ºC. Y al anochecer, entá s’esperen temperatures anómales sobremanera nel centru y nel oriente cuidao que el día va concluyir con rexistros percima de los 13 o 14 ºC en munchos puntos d’estos sectores.
En cuanto al estáu de los cielos, prevense dellos intervalos de nubes altes que van tender a retirase cola meyora de la mañana, polo que’l sol va tener un claru protagonismu mientres les hores centrales del martes.
