Esperamos una xornada estable en tol Principáu d’Asturies. Los cielos van tar pocu nublos o inclusive estenos. A lo sumo, podría apaecer dalgún intervalu de nubes altes ensin importancia. La probabilidá de precipitaciones va ser nula. Los vientos van ser fluexos salvu nel cordal onde podríen soplar de sur con intensidá moderada (hasta 50 o 60 km/h nes zones más altes). Les temperatures máximes van xubir llixeramente nel suroccidente (hasta 1 o 2 ºC más) y van baxar namá na mariña oriental. Nel restu van caltener ensin cambeos significativos. Les mínimes, pela so parte, van esperimentar un descensu xeneralizáu d’hasta 2 o 3 ºC en relación a les anotaes el miércoles.
El vienres esperamos la llegada d’un frente fríu. Yá dende primeres hores de la mañana vamos tener abondosa nubosidad nel occidente. Conforme trescurran les hores estes nubes dirán estendiéndose por tola rexón dexando al so pasu precipitaciones. A la fin del día la inestabilidá va unviar y, inclusive, nun se refuga que se vaigan abriendo claros dende l’oeste asturianu. Los vientos van predominar de poniente fluexos con raches moderaes. Les temperatures diurnes van esperimentar un descensu notable d’hasta 6/8 ºC menos que les que vaigamos rexistrar el xueves. Les mínimes apenes van variar.
El sábadu y el domingu volveremos esfrutar d’un tiempu estable nel que’l sol volverá cobrar protagonismu.
