¿Qué futuru espéra-yos a los bolos asturianos? El deporte autóctono esta mancáu, pero la so gran familia niegase a dexalo morrer en perdiendo la metá de fiches dende 2010. Les modalidaes federaes apuren sofitu y volver a los colexos para evitar la so desapaición. LNE / LNE
El deporte autóctono por excelencia traviesa, probablemente, la mayor crisis de la so hestoria y, aun así, aguanta. Les socesives recesiones económiques, el golpe devastador de la pandemia y la competencia feroz de los deportes d’élite fueron arrequexando un xuegu que, magar tou, caltien n’activu a 75 equipos y 698 xugadores federaos partíos en cinco modalidaes —cuatriada, celta, vaqueiru, palma y batiente— con boleres distribuyíes pel centru y les nales de la rexón.
Les cifres, sicasí, falten enforma de los barganal de 1.500 llicencies y más d’un centenar de peñes qu’esistíen en 2010. LA NUEVA ESPAÑA axuntó ayeri a dellos representantes de les distintes especializaes en La Morgal (Llanera), qu’amosaron la so disposición a remar xuntos pa evitar qu’una de les principales señes d’identidá d’Asturies caya nel olvidu.
Hasta’l segundu cuartu del sieglu XX, cuando’l fútbol arrampuñó-y el tronu, los bolos fueron el deporte rei de los asturianos. El so postreru gran ciclu espansivu viviose ente 1996 y 2012, coincidiendo cola etapa del yá fináu Desiderio Díaz al mandu de la Federación Asturiana.
Naquellos años dobláronse les 750 llicencies iniciales, la televisión autonómica retresmitía partíes en directu y construyéronse más de 60 boleres en colexos. Floriaron torneos de gran formatu, como’l popular «Un millón pal meyor impulsáu pol Conceyu d’Uviéu, y celebráronse mundialinos con xugadores de dellos centros asturianos d’América y Europa.
Trelce años dempués, marcaos pola estrechura presupuestaria y l’escasu respaldu institucional, el panorama ye bien distinto. L’actual presidente de la Federación, Iván Rivas (Riañu, 1990), excampeón d’Asturies de cuatriada, trata de revertir l’enclín sofitándose en llogros como la declaración de Bien d’Interés Cultural (BIC) llograda en 2017 y na collaboración cola Conseyería de Cultura pa diseñar un plan estratéxicu al traviés de la mesa pol deporte tradicional constituyida en xunu de 2024. «Si nun hai un cambéu d’aldu, corremos el riesgu de sumir», alvierte Rivas, daqué más esperanzáu en conociendo que’l Principáu va alzar anguaño les ayudes de 7.000 a 30.000 euros.
Los datos de 2025, comparaos colos de va trés llustros, dibuxen xuna disciplina en retrocesu aceleráu. La cuatriada, modalidá mayoritaria que s’espandió al calor de la minería pel centru y l’oriente, ye la que más sufrió. Apenes suma 230 llicencies, cuando en 2012 superaba con floxura les 400 y, nos meyores años d’empiezos de sieglu, cuntaba con 150 xugadores de cantera; güei apenes ronda la ventena.
La Mudrera tira de la cuatriada: el resurdir de los bolos en Tiuya dempués de 40 años
El cayente empieza na base. A finales de la primer década del sieglu había más de 60 boleres actives en colexos asturianos. Una rede de monitores empecipiaba a los mozos y delles peñes nutríen asina la so cantera. La gran crisis camudó l’escenariu: la subvención rexonal pasó de 42.000 a 6.000 euros añales. Desmanteláronse les clases nos centros educativos y munches boleres escolares fueron reconvertíes o baltaes por falta d’usu.
La perda progresiva de recursos amenorgó’l númberu de fiches, pero’l golpe definitivu llegó en 2020. La pandemia paralizó mientres más d’un añu les competiciones. Cola maquinaria detenida, plantiyes avieyaes vieron retirase a los so xugadores veteranos y l’ausencia de torneos infantiles y xuveniles frenó’l relevu xeneracional. L’esbarrumbe foi inmediatu. Munches peñes cerraron. N’Uviéu yá nun queda nenguna n’activu; nel oriente pasóse de más de venti equipos a solu trés nuna década; y boleres monumentales como la cubierta de Llugones, inaugurada en 2000, apenes atopen usu magar que Siero sigue siendo’l conceyu con más equipos, seis en total.
El bolu celta, con epicentru en Tinéu, reaccionó en 2012 creando una asociación pa defender la so supervivencia. Entós sumaba 228 llicencies; güei caltien en redol a 200. Hai, amás, señales alentadores: competiciones recién axuntaron a 135 moces y la lliga femenina, integrada por 20 muyeres, rompió un históricu techu de cristal. La pasada temporada participaron 19 equipos.
El bolu vaqueiru, con asociación propia dende 2000, considérase un exemplu de resiliencia. En Cangas taba prácticamente escastáu cuando se creó’l colectivu; xuna década dempués algamó 280 llicencies. Sicasí, el cayente de la minería y l’éxodu xuvenil del suroccidente amenorgaron la práctica hasta les 170 fiches actuales. En 2025 compitieron 21 peñes na lliga, con un equipu d’Uviéu y dos lleoneses (de L.laciana y Vil.lablinu).
L’oriente asturianu vive una situación especialmente delicada. El bolu palma o birle, modalidá reina na vecina Cantabria y con tradición en Llanes, Peñamellera y Ribedeva, cerró 2025 con ocho peñes y 58 llicencies, bien llueñe de les más de 300 de principios de sieglu. Catorce xugadores compiten en Cantabria, onde esisten 200 equipos y 2.000 federaos. «Esto acábase, nun creo qu’haya solución», llamentó Ico Núñez en proclamándose campeón d’Asturies de primera, como únicu xugador asturianu con llicencia nesa categoría.
La batiente, con una mecánica qu’a los ensin empecipiar recuerda al bowling americanu y una llarga hestoria na rexón, tamién s’apaga con rapidez. Solo sobreviven cuatro clubes y 40 federaos: 22 na peña El Tueru de Pravia, ocho na Moscona de Grau, siete en casa Jenaro (Carreño) y trés en Ballota (Cuideiru). «El panorama ye desolador», sentencia’l delegáu de la modalidá, Fernando Blanco, que confía en reaccionar antes de correr la mesma suerte d’otres modalidaes como’l bolu rodao (Lloza-Coaña) y -y bolu lleonés, que va dos décades teníen xuna trentena de llicencies y güei yá solo practícase a nivel priváu.
Detrás d’estes cifres hai un abandonu progresivu de boleres, delles centenaries. El zarru de peñes implica la perda d’espacios emblemáticos y de un texíu social que mientres xeneraciones vertebró Asturies. La reconocencia como BIC supunxo en 2017 una llombarada simbólica al valor cultural de los bolos, pero inda nun tuvo efectos tanxibles na recuperación de la so práctica nin nel caltenimientu del so patrimoniu. La supervivencia d’esti xuegu ancestral va depender de que la tradición atope un nuevu enraigono nes xeneraciones nueves y de que les instituciones sofiten con fechos una de les señes esencial de la identidá asturiana.
