Un 25% de los estudiantes va a clases particulares y gasta de media cuasi 100 euros al mes. RTPA
Ún de cada cuatro estudiantes de Primaria y Secundaria d’España va a clases particulares. En Bachilleratu, un 35% recurre a elles. En xeneral, los estudiantes con necesidaes educatives especiales o problemes de conducta son los que más usen esti refuerzu, failo cuasi un 49%.
Les materies más demandaes son l’inglés con cuasi un 53% y les matemátiques con daqué más del 40%. Lo que menos, química con un 8,4%. Al añu esti sector mueve n’España unos 1.480 millones d’euros.
L’informe ‘La educación en la sombra en la península ibérica’ asoleyáu pol Observatoriu de la Fundación ‘La Caixa’, pon el focu na desigualdá ente llares, los que tienen mayor renta gasten un 18% más en clases particulares, que los que tienen menos.
Esto fai que les families con menos recursos tengan menos accesu a oportunidaes educatives y de futuru pa los sos fíos. Faen, sicasí, un esfuerzu a costa d’otros gastos como ociu o ropa.
Les academies afiten que cada vegada se recurre más a les clases particulares como métodu de refuerzu
Les academies son clares. Cada vegada recúrrese más a les clases particulares como métodu de refuerzu, sobre manera dende la pandemia.
Ente los motivos, reforzar los conocimientos algamaos, elevar notes nel casu d’estudiantes de bachiller o simplemente motivaos polos propios centros educativos.
Si hai una asignatura que destaca ye inglés. El 52% de los menores van a clases, daqué que se fai cada vegada dende una edá más temprana. Una tendencia que llega dende años atrás.
Con precios que van dende los 60 euros por dos hores selmanales a los más de 100 por clases caldía, les families destinen al rodiu de 95 a clases complementaries.
Dende les academies reconocen l’esfuerzu y aseguren que les families con menos recursos recorten d’otru llau p’asegurar la formación.
