Ledo anuncia que la protección del llabor y l’autoridá del profesoráu van formar parte de la Llei d’Educación del Principáu. La conseyera recuerda que yá esiste una llei específica vixente dende 2013 y un decretu del añu 2019 que concede presunción de veracidá al docente. Actualidá
La conseyera d’Educación, Eva Ledo, anunció güei que la protección del llabor del profesoráu y la reconocencia de la so autoridá van formar parte de la futura Llei d’Educación del Principáu, que’l Gobiernu ta empezando a tramitar. “Esa llei va ser el paragües normativu o marcu llegal que va desenvolver, va afaer y va concretar les directrices básiques a la realidá específica de la nuesa comunidá”, esplicó Ledo mientres la so comparecencia na Comisión d’Educación de la Xunta Xeneral.
La conseyera recordó que’l Principáu yá cunta dende 2013 con una llei d’autoridá del profesoráu, d’aplicación en tolos centros sosteníos con fondos públicos, “que-y reconoz el derechu al respetu y la considerancia per parte de los miembros de la comunidá educativa, y asigna xeres al respeutu a families, alumnáu y alministración”.
Coles mesmes, en 2019 publicóse’l cambéu del Decretu 249/2007 de derechos y deberes del alumnáu nel Principáu que, ente otros aspeutos, afacer a la citada llei de 2013 d’autoridá del profesoráu. Amás d’establecer les sos competencies frente a la vulneración de les normes de convivencia y les midíes disciplinaries aplicables, otorga al docente la presunción de veracidá énte cualquier conducta grave contra la so autoridá.
Poro, con esi marcu normativu yá esistente nel Principáu, la conseyera consideró que la futura Llei d’Educación va suponer “l’escenariu fayadizu pa protexer y potenciar el llabor del docente frente a conductes disruptivas”.
