La Puela Ayande va acoyer en mayu unes xornaes d’arqueoastronomía nes que se va falar de la relación ente castros, dólmenes, túmulos y templos col Sol y otros astros. El Comercio
Conocer y, sobremanera, entender el venceyu ente les construcciones ancestrales del suroccidente d’Asturies y les estrelles. Ye l’aspiración que motivó la organización d’unes xornaes sobre arqueoastronomía qu’el 30 de mayu van axuntar en La Puela Ayande a espertos y aficionaos de toa España.
Nestes xornaes va falase d’astronomía megalítica, de la orientación de túmulos, dólmenes y templos de distintes relixones y tamién de si la distribución del castru San Chuis y l’orientación de les sos muralles tien que ver o non cola salida y la puesta del Sol.
Y ye qu’entá nun hai nengún estudiu que respuenda por esa relación ente l’astronomía y la distribución del xacimientu allandés, pero «sí hai numberoses relaciones entre dólmenes y túmulos funerarios col Sol o la primer vegada del añu que se ve una estrella concreta, por casu. Ye daqué bien estudiáu n’otros sitios, como Exiptu», esplica l’astrofísica Lucía González, cara de la iniciativa Ayande Stars, que suma estes nueves xornaes a un estensu programa de divulgación astronómica que s’intensificó énte l’eclís total de Sol del 12 d’agostu.
Ello ye que l’anunciu d’estes xornaes d’arqueoastronomía realizóse mientres xuna visita empuesta al castru (a cargo Andrés Menéndez, doctor n’Hestoria) cola que se punxo la guinda a una fin de selmana dedicada a la observación del cielu d’Ayande que rexuntó a una trentena de persones.
Mientres el percorríu pol castru, Menéndez esplicó que San Chuis ye unu de los asentamientos castreños más importantes d’Asturies, tanto poles sos dimensiones como pol so periodu d’ocupación, del sieglu VIII a. C. a dómina romana. Amás, el so allugamientu, a más de 750 metros d’altitú, fixo d’él un enclave de gran valor estratéxicu y güei, un llugar bien significativu pa falar del Sol, anque «ye difícil saber cómo los sos habitantes víen el cielu y qué creencies teníen sobro los astros», señaló Menéndez.
Por eso, dambos confíen en qu’el «minicongresu» d’arqueoastronomía previstu pal mes de mayu sía’l primer pasu por que’l xacimientu castreño d’Ayande puea convertise en focu d’interés pa esti tipu d’estudios. Lo que ye seguro ye que va ser un alcuentru pa falar y cavilgar «sobro cómo’l cielu tuvo muncho más presente na Hestoria de lo que ta agora», repostió González.
