Esti llunes depáranos un empiezu de selmana con una xornada marcada por vientos de componente sur moderaos que podríen aportar a localmente fuertes en zones altes del cordal mientres la primer metá del día. Pela tarde los vientos van ser fluexos y posiblemente variables. Gracies a estos vientos de sur pela mañana vamos amanecer con unes temperatures bien prestoses nel centru y nel oriente asturianu.
Y conforme vaiga avanzando la mañana, les temperatures van dir xubiendo hasta averase a los 20 ºC. Les máximes van xubir hasta 4 ºC na mariña, van baxar llixeramente nel suroccidente y van caltenese nel restu. Les mínimes van xubir de forma notable y xeneralizada. En cuanto al estáu de los cielos, prevense escamplaes de primeres anque con aumentu de nubes medies y altes mientres el llunes. La probabilidá de precipitaciones va ser baxa pero nun se refuga que pueda escapase dalguna gota pela tarde nel estremu oeste y nel cordal.
Para los siguientes díes vamos siguir con estabilidá anque tou apunta a un empeoramientu a lo llargo del xueves y, sobremanera, el vienres.
