«Al Son»

El programa Al Son, dirixíu y presentáu por Xune Elipe, escomenzaba la so emisión en febreru del 2021, realizando nesi añu 50 capítulos; nel 2022 seríen otros 20 los capítulos emitíos. En total foron setenta les entregues d’esti espaciu; capítulos que trataron munchos y mui variaos aspectos sobre la música asturiana.

• Fonte: MusicAsturiana / RPA enllaz capítulos / Spotify /
• La radio pública retoma esta enciclopedia sonora con novedaes que va poder sentise tolos sábados a les 22h y va tar disponible a la carta

Por exemplu: pioneros de la música asturiana, l’asturianada contemporánea, Nuevu Canciu Astur, la mina na música asturiana, pop llariegu, celtismu, les bandines tradicionales, folk de cámara, jazz de raigañu, rock n’asturianu, la revolución de la pandereta, cantares de sidra, movimientu coral, bandes de gaites, la emigración na música asturiana, voces femenines, la música del Navia-Eo, Eduardo Martínez Torner o vanguardies. Ente tolos capítulos faen una de las mayores enciclopedies sonores sobre la música asturiana qu’existe actualmente, y que ta puesta a disposición de tol públicu interesáu.

Una vez acabada esta primer etapa del programa y llográu l’oxetivu de rexistrar esa «enciclopedia sonora» de la música asturiana, retomamos agora la emisón de temporaes nueves. La idea ye qu’Al Son tea al tantu fundamentalmente de l’actualidá de la música asturiana, informando de les novedaes que vayan editándose y de tola actividá que xenere (conciertos, eventos, publicaciones…), amás d’incorporar distintes secciones.

Creyemos qu’un espaciu como esti ye mui necesariu nun mediu de comunicación como RTPA y un exemplu de serviciu públicu. El programa Al Son propón un tratamientu exhaustivu y fondu del fechu musical asturianu, con una periodicidá selmanal -sábados, 22:00 hores y en RPA a la carta-.

Hai una producción importante de música asturiana y n’asturianu o gallego-asturianu en tolos formatos, ta prevista la salida de munches novedades nesti añu 2025, les actuaciones, conciertos y festivales volvieron con fuercia y xeneren tamién abondantes noticies, colo que la repercusión de la música asturiana ye cada vez mayor.

La música asturiana ye anguaño una realidá con puxu, dinámica y con incidencia social, polo que merez un tratamientu específicu nel mediu de comunicación públicu asturianu; Al Son va dir dando cuenta de too ello y quier ser el programa de referencia.