RAP n’AST

Musicasturiana.com publica’l compilatoriu dixital ‘Rap n’ast’

Ye un resume de cuasi 30 años de rap del país qu’axunta 16 temes d’esti estilu tanto na so versión más pura como entemecíu con otros sones.

Yá pue sentise en toles plataformes musicales Rap n’ast, un discu dedicáu al rap del país editáu por Musicasturiana.com. Esta compilación axunta dieciséis temes d’esti estilu musical tanto na so versión más pura, como entemecíu con otros sones como’l rock, reggae, dembow, folk, spoken word o electrónica. Llingüísticamente, predominen los temes n’asturianu, anque tamién hai dalgún n’amestáu o que combina asturianu y castellanu. Con esti llanzamientu Musicasturiana.com estrena’l so llabor d’asoleyar compilaciones en formatu dixital; una xera a la que va sigui-y dando continuidá próximamente.

Rap n’ast amuesa la diversidá del hiphop con identidá asturiana, un estilu que nació en 1997 cola publicación del cantar «Si España qu’españe» d’Anarquía Positiva, nel discu L’Asturianu Muévese. D’esta manera, nel álbum pueden sentise a los nomes nuevos venceyaos a esti xéneru en mayor o menor midida (Mostru l’Horru, Bimenes Underprau, Ferla Megía, El Velcro, Fred Warrior); a artistes veteranos de la escena (K-Nalón, Dani Stylo); a intérpretes de rap en castellanu qu’usen davezu l’asturianu o’l amestáu (Arma X, Machodeferia, Doris Escarlata); a esperiencies musicales puntuales que tuvieron influenciaes pol hiphop (Soncai System, Músicos Pola Oficialidá); y dalgunos temes de grupos rock qu’incorporaron sonoridaes rap (Dixebra, Skontra, La Tarrancha).

Cola edición d’esti compilatoriu, Musicasturiana.com quier facer un reconocimientu a un estilu que nun tien la estabilidá, tamañu y repercusión qu’otres escenes de la música n’asturianu; pero que sí qu’amosó a lo llargo de cuasi tres décades qu‘hai cierta continuidá gracies a artistes que caltuvieron la so actividá nel tiempu, otros nomes que fueron surdiendo hasta anguaño, otros qu’asturianizaron la so propuesta y otros que, nun formando parte esplícitamente d’esta escena, si que tuvieron influencies d’ella.

Más compilaciones

Esti llanzamientu ye’l primeru de los compilatorios en formatu dixital qu’asoleya Musicasturiana.com. La intención d’esti portal ye la d’editar periódicamente más álbumes d’esti calter dedicaos a distintos aspectos de la música’l país. Asina afonda na so xera de dinamizar esta escena nes plataformes dixitales más allá de la creación de playlists de Spotify y de llistes de reproducción de YouTube.