Les muyeres de Surdiversu Ver páx 22 y 23
La lliteratura asturiana ye bien bayurosa dende’l so aniciu. Prueba d’ello ye’l llabor pioneru de Xosefa Xovellanos, Teresa Cónsul o Enriqueta González Rubín. Na estaya poética destaquen tamién los trabayos con nome de muyer, sobre manera na dómina que va dende l’empiezu del Surdimientu hasta anguaño.
Y esi llabor bien granible tien el so bon reflexu na obra nueva Surdiversu, un llibru editáu por Cuatro Gotes Ediciones con Berto García como coordinador, nel que s’amuesa una escoyeta de poemes de les obres ganadores de los premios de poesía n’asturianu convocaos dende l’añu 1984 hasta esti 2024, mesmo que poetes d’importancia crucial na lliteratura asturiana.
D’esta manera, los principales poemes con nome de muyer, tán nes páxines d’esta edición cuidada que fai repasu a la lliteratura asturiana contemporánea. Son 39 les poetes qu’apaecen nesta edición, siendo Sabel de Fausta la más veterana na xera de la escritura y Lola del Gallego la más moza. Pel mediu, grandes nomes de la lliteratura recién, como Berta Piñán, Laura Marcos, Nené Losada, Taresa Lorences, Vanessa Gutiérrez, Aida Escudero, Rosa Cunqueira, Sofía Castañón o la Premiu Nacional de Lliteratura Asturiana, Lourdes Álvarez, ente munches otres.
Les poetes asturianes contemporánees aborden una variedá de temes que van dende la naturaleza y la identidá cultural hasta les cuestiones de xéneru, la política y les emociones humanes. Les sos obres reflexen les realidaes sociales y los retos a los que s’enfrenten les persones na sociedá asturiana actual, aportando una visión única y personal d’esta realidá.
Nun panorama lliterariu onde les poetes asturianes caltienen una presencia destacada, ye evidente’l so rol esencial na construcción d’una tradición lliteraria viva y resiliente. La so creatividá y compromisu colos valores y les estétiques propies d’Asturies contribúin a arriquecer la llingua asturiana y a dar voz a les esperiencies femenines y colectives. Asina, les poetes asturianes siguen siendo protagonistes indispensables nel mundu de la lliteratura contemporánea, faciendo resonar la so voz ente la borrina d’un mundu protagonizáu por homes.