Guantes cuando tea indicáu,
hixene de manos siempres.
Salú recuerda la importancia de la llavadura de manos, la midida más eficaz para prevenir infecciones. L’HUCA va axuntase a profesionales y estudiantes para compartir les bones práctiques que se desenvuelven nes árees sanitaries. El Principáu programa actividaes y talleres para concenciar, con motivu del día mundial sobro esta práctica d’hixene.
- Fonte: Actualidá Asturies / cartelu / Info: https://acortar.link/D5HMPf
La Conseyería de Salú recuerda que llavase bien les manos con agua y xabón o con una solución hidroalcohólica ye la práctica más eficaz y barata para prevenir la tresmisión de microorganismos, dalgunos d’ellos multirresistentes, y evitar infecciones.
Para sorrayar la importancia d’esta práctica, que salva vides, les conseyeres de Salú, Concepción Saavedra, y d’Educación, Lydia Espina, van participar nun taller con escolares del Colexu Públicu de Ventanielles coincidiendo col Día Mundial de la Hixene de Manos, que se conmemora mañana.
Amás, l’Hospital Universitariu Central d’Asturies (HUCA) va acoyer el próximu miércoles, 7 de mayu, una xornada na que van participar profesionales de diversos ámbitos y alumnáu, y que va tar abierta al públicu polo xeneral. Nel actu compartirán les bones práctiques que se tán desenvolviendo nes ocho árees sanitaries para promover la hixene de manos. Como parte de la xornada, va celebrase escape room temáticu para siguir fomentando la participación y l’aprendizaxe.
Les árees sanitaries tamién van acoyer diverses actividaes para conmemorar una xornada para la que la Organización Mundial de la Salú (OMS) escoyó’l lema Guantes cuando tea indicáu, hixene de manos siempres.
Área sanitaria IV-Uviéu
Mientres la selmana van esponese nel atriu del Hospital Universitariu Central d’Asturies (HUCA) los trabayos presentaos al concursu de dibuxu Manes a la obra, dirixíu a población infantil de la área y menores familiares de trabayadores.
El martes, l’alumnáu de les aules de Pediatría va poder participar nel xuegu de la ruleta de la conocencia, con entrugues sobro la hixene de manos.
