Educación anima al alumnáu a escoyer la nueva ufierta d’asturianu nel segundu ciclu d’Infantil, que va empezar el próximu cursu. Les
families van poder solicitar esta enseñanza voluntaria para los sos fíos y fíes mientres el periodu de matriculación, del 18 al 25 de xunu. Fonte: Actualidá Asturies
La conseyera d’Educación, Lydia Espina, animó güei en Candás a la comunidá escolar a espublizar la nueva ufierta d’asturianu nel segundu ciclu d’Infantil (3 a 6 años), que se va estrenar a partir del próximu cursu. Espina participó nel actu d’entrega de premios de los cinco certames escolares convocaos por cuenta de la 46 Selmana de les Lletres Asturianes.
Esti aproximamientu pioneru a la llingua autóctona n’Infantil va realizase simultáneamente en tolos cursos y en Comunicación y representación de la realidá, que ye una de les trés árees d’aprendizaxe d’esa etapa educativa. Va tener calter voluntariu para l’alumnáu -tal que preve la Llei 1/1998, de 23 de marzu, d’usu y promoción del bable asturianu-, pero tolos centros qu’impartan esti ciclu tendrán d’incluyilo na so ufierta.
Les families intereaes n’inscribir a los sos fíos y fíes tendrán de formalizar una solicitú nel centru mientres el periodu de matriculación, del 18 al 25 de xunu. La conseyería unvió yá a los equipos directivos de los colexos un primer boletín, qu’inclúi’l modelu de formulariu que tendrán de rellenar les families y otru con información complementaria.
Espina destacó’l compromisu del profesoráu d’asturianu, qu’escarez de la reconocencia como especialidá docente al nun ser una llingua oficial y que tampoco se puede estabilizar, nin presentase a unes oposiciones. “Tenéis que saber que nel momentu en qu´atopemos la menor oportunidá, vamos correxir esta situación. Nun voi cansar de picar a toles puertes que seyan necesaries. Tenéis el mio compromisu”, aseguró mientres la so intervención.
Delles midíes de promoción
La conseyera numberó otres midíes adoptaes para la promoción de les llingües autóctones, como la presencia nes escueles oficiales d’idiomes a partir de setiembre, la recuperación de l’Axenda Didáctica con una programación cultural para l’alumnáu, la creación d’una categoría d’asturianu y eonaviego nos premios estraordinarios al rendimientu académicu o del sellu Llume para los centros con proyectos innovadores.
“Paezme, bonalmente, qu’estes polítiques tan dando frutu y la matrícula ta espolletando”, apuntó la titular d’Educación. Esti cursu la matriculación en Llingua Asturiana y Lliteratura aumentó un 1,2% respectu al anterior, hasta llegar a 22.909 estudiantes, la meyor cifra de los últimos años.
Al respective de los certames escolares, anguaño participaron unos 60 centros educativos con 550 trabayos n’asturianu y eonaviego. Los concursos yeren de creación artística/lliteraria, creación audiovisual, cartelismo, teatru escolar y podcast. A la gala d’entrega, celebrada nel Teatru Priendes, asistieron unos 360 estudiantes de 40 centros d’enseñanza.
