Amantes de la cocina asturiana… ¡El #TortoDay torna a la rexón! Esti miércoles La Tabierna Asturiana, en Xixón, y Les Tables del Campillín, n’Uviéu, van ufiertar los sos particulares homenaxes a ese icónico alimentu autóctono, incluyendo menúes temáticos que van poder tastiase hasta’l 30 de mayu. Fonte: MiXixón /
Asturies ye sinónimu de tortos, porque, magar la so aparente simplicidá, esa humilde masa de maíz convirtióse, por méritos más que sobraos, en tou un estandarte de la cocina del Principáu.
Y, un añu más, dos establecimientos hosteleros de la rexón van dedicar esti miércoles el so particular homenaxe conxuntu a esti alimentu. Efectivamente, mañana dambos locales van celebrar la tercer edición del #TortoDay, herederu directu de los más llonxevos #CachopoDay y #PoteDay, y con motivu del cual los veceros van poder tastiar diverses creaciones culinaries col tortu como protagonista común.
Como nos dos cites anteriores, La Tabierna Asturiana va ser l’epicentru d’esti apueste. Ellí, una trentena d’invitaos, venceyaos a ámbitos como la moda, el deporte, la gastronomía, los viaxes o la cultura, van axuntase en redol a la mesa para tastiar diverses creaciones ellaboraes en redol al tortu, acompañaes de productos locales y, inclusive, de fora de la rexón. L’eventu tamién va cuntar cola collaboración de marques que, amás de tar presentes na comunicación del eventu, van formar parte de la esperiencia física, apurriendo productos o formando parte del menú como entrante, *maridaje o postre. Por si fora pocu, tantu’l restorán xixonés como Les Tables del Campillín van ufiertar a los sos veceros menúes temáticos, accesibles hasta esti vienres, 30 de mayu.
«Queremos que #TortoDay sía un homenaxe al productu, a la nuesa tierra y a toles marques qu’apuesten pol sabor, la identidá y el saber faer d’Asturies», destaca Noelia Solla, promotora d’esti acontecimientu. Una frase envuelta n’una nada disimulao allegría, yá que, entá siendo daqué ayenu al eventu, son dellos los establecimientos autóctonos que tán abrazando la idea. «Encántanos. Tolo que sía fomentar la gastronomía del Principáu suma, y eso ye daqué que tenemos de valorar».
